【兩大溝通技巧 塑造更好形象】
我之所以鍾意研究心理學，除咗滿足求知欲，另一原因就係夠實用。人同人相處之間，就係玩緊心理遊戲，無論追女仔、見工、傾生意、要求加人工，只要同人談判，就會涉及心理戰。
心理戰雖然好玩，不過我無打算教大家攻心計(笑)，今次分享兩個小技巧，純粹令大家在與人溝通時，建立更好個人形象。
第一，6:4之比：溝通係雙向，表達想法係重要，但學識聆聽更加重要。就算你有幾多想法、口才有幾伶俐，有來有往溝通模式，比起單方面連珠炮發好。咁溝通時間比例方面呢？根據心理學，原來一段對話裡面，自己講太多或者太少，都會減低人格魅力。而最好黃金比例係6:4，自己講嘢佔六成時間，對方講嘢佔四成時間，啱啱比對方多少少，能最有效提升個人魅力。
第二，對方講先：另一個技巧就係「you first」，即係先問對方意見，等對方答完，你再分享自己睇法。長久以來，大家都標籤成功人士係主動、勇於表達。所以喺職場上，唔少人為咗得到話語權，溝通時都會先發制人，希望控制大局，導致係咁講嘢，忽略聆聽嘅重要性。其實同人溝通時，收埋舌頭打開耳仔，先聆聽對方意見，不單令對方有受尊重感覺，喺適當時候你再俾反應，等對方覺得你講嘢有思考過又有價值，自然對你留底好印象喇！
Search